54

تین بڑی پارٹیاں ایف اے ٹی ایف کیلئے قانون سازی پر ایک ہوسکتی ہیں تو جنسی درندوں کو نشان عبر ت بنانے کیلئے کیوں متحد نہیں ہوتیں۔ سینیٹر سراج الحق کاموٹروے واقعہ اور بڑھتے ہوئے جرائم کے خلاف وزیر اعلیٰ سیکرٹریٹ کے سامنے احتجاجی دھرنے سے خطاب

لاہور 17ستمبر2020 ئ
امیر جماعت اسلامی پاکستان سینیٹر سراج الحق نے کہاہے کہ حکومت اور دو بڑی جماعتیں میچ فکسنگ کرتی ہیں ۔ تینوں بڑی جماعتیں بین الاقوامی ایجنڈا پر ایک ہیںاور مل کر آئی ایف اور ورلڈ بنک کی غلامی کے قانون بناتی ہیں۔یہ پارٹیاں ایف اے ٹی ایف کیلئے قانون سازی پر ایک ہوسکتی ہیں تو جنسی درندوں کو نشان عبر ت بنانے کیلئے کیوں متحد نہیں ہوتیں۔حکمران اپنے بنگلوںاورایئر کنڈیشن کمروں میں بیٹھے ہیں اور کہتے ہیں کہ ہم تبدیلی لائے ہیں۔عوام جب بھی حکمرانوں سے تبدیلی کا مطالبہ کرتے ہیں حکمران کسی چیف سیکرٹری ،آئی جی یا پولیس آفیسر کو تبدیل کردیتے ہیں ۔تبدیلی چھوٹے ملازمین کے تبادلوں سے نہیں حکمرانوں کو بدلنے سے آئے گی۔ پاکستان کے سب سے بڑے صوبے میں ماو ¿ں بہنوں بیٹیوں کی عزتیں محفوظ نہیں ہیں۔جس پاکستان میں بچے اور بچیاں محفوظ نہیں ہیں، ایسے ماحول میں حکمرانوں کو شرم آنی چاہئے۔جماعت اسلامی پاکستان کے 22 کروڑ عوام ، ماو ¿ں بہنوں بیٹیوں کے تحفظ کی بات کرتی ہے ۔ایک بہن حکومت اور ریاست سے حفاظت اپنی کے واسطے دیتی رہی مگر حکومت اور ریاست ایک بے بس بیٹی اور بہن کو تحفظ نہیں دے سکی۔ جنسی درندوں کو سر عام پھانسی پر لٹکایا جائے ۔ان خیالات کا اظہار انہوں نے جماعت اسلامی وسطی پنجاب کے زیر اہتمام موٹر وے واقعہ کے خلاف وزیر اعلیٰ سیکریٹریٹ کے سامنے دیئے گئے احتجاجی دھرنے سے خطاب کرتے ہوئے کیا۔دھرنے سے سیکرٹری جنرل امیر العظیم ،نائب امیر لیاقت بلوچ ،ڈاکٹر فرید احمد پراچہ ، امیر جماعت اسلامی شمالی پنجاب ڈاکٹر طارق سلیم ،علامہ ابتسام ا لٰہی ظہیر ،پنجاب وسطی کے امیرجاوید قصوری ،پنجاب وسطی کے سیکرٹری جنرل حافظ بلال قدرت بٹ ،جے آئی یوتھ کے صدر زبیر احمد گوندل ،لاہور کے امیر ذکر اللہ مجاہدنے بھی خطاب کیا۔دھرنے میں عورتوں اور بچوں نے بھی ہزاروں کی تعداد میں شرکت کی۔اس موقع پر سیکریٹری اطلاعات قیصر شریف اور سیکرٹری جنرل شمالی پنجاب اقبال احمد خان بھی موجود تھے ۔
سینیٹر سراج الحق نے کہا کہ دو سو ستر دن گز رگئے عوام وزیر اعلیٰ پنجاب سے پوچھتے ہیں کہ آپ نے اب تک کچھ سیکھا ہے یا ابھی سیکھ رہے ہیں۔اگر دو سال میں بھی آپ کچھ نہیں سیکھ سکے توآپ جیسے نااہلوں کو حکمرانی کا کوئی حق نہیں ۔انہوں نے کہا کہ سرکاری اعداد و شمار کے مطابق گزشتہ چھ مہینوں میں 322 بچوں اور بچیوں پر جنسی حملے ہوئے۔24گھنٹوں میں جنوبی پنجاب میں 11 بچوں پر حملے ہوئے اور چار بچوں کو بے دردی سے قتل کردیا گیا ۔پی ٹی آئی کے دو سال میں 32 فیصد جرائم کی شرح میں اضافہ ہوا ہے ۔انہوں نے کہا کہ جس طرح بھٹو کی حکومت میں 1971 میں مشرقی پاکستان بنگلہ دیش بنا، موجودہ حکومت میں کشمیر انڈیا کا حصہ بن گیا۔
سینیٹر سراج الحق نے کہا کہ پی ٹی آئی کی حکومت میں عوام کا جینا مشکل ہو گیا ہے۔اس حکومت میں مالی ، اخلاقی و نظریاتی کرپشن میں اضافہ ہوا۔زینب بل پاس ہوئے ایک سال گزر گیا لیکن آج تک اسکا نوٹیفیکیشن تھانوں تک نہیں پہنچایا گیا۔انہو ں نے کہا کہ ہم نے زینب الرٹ بل میں ترمیم پیش کی کہ پھانسی کی سزا ہونی چاہئے، مگرکسی جماعت نے ساتھ نہیں دیا اور کہا کہ یہ وحشت اور بربریت ہے۔میں وزیر اعظم سے پوچھتا ہوں کہ جو سزا اللہ اور اللہ کے رسول نے مقرر کی آپ اسکا نام لیتے ہوئے کیوں گھبراتے ہیں۔جو سزا وزیر اعظم نے تجویز کی ہے تو کیا اس کے بعد وہ شخص اس معاشرے سے انتقام نہیں لے گا؟انہوں نے کہا کہ اللہ تعالیٰ پاکستان کو اس صورت عظیم بنائے گا جب یہاں اللہ کا نظام قائم ہو گا۔عوام حکمرانوں کے دین پر چلتے ہیں آج حکمران ٹھیک ہو جائیں تو معاشرہ ٹھیک ہو جائے گا۔انہوں نے کہا کہ پاکستان میں خوشحالی اور نظام کی تبدیلی کی ضرورت ہے جس کے لئے عوام جماعت اسلامی کا ساتھ دیں۔
دھرنے کے شرکاءسے خطاب کرتے ہوئے لیاقت بلوچ نے کہا کہ موٹروے کا واقعہ نہایت افسوسناک ہے۔موٹروے کا واقعہ پاکستان کے لئے شرمناک واقعہ ہے اور ملک کے ماتھے پر بدنامی اور کلنک کا ٹیکہ ہے ۔آج پورا ملک صدمے کی کیفیت میں ہے ۔مائیں بہنیں ،بیٹیاں سراپا احتجاج ہیں مگر موم بتی مافیہ چھپ گیاہے، انہیں یہ ظلم اور زیادتی نظر نہیں آرہی۔انہوں نے کہا کہ یہ بڑا المیہ ہے کہ حکومت و پولیس کے موقف نے قوم کے زخموں پر نمک چھڑکا۔حکومت و پولیس کے موقف نے یہ بتایا کہ ہم اس ملک کی حفاظت نہیں کر سکتے خواتین گھروں سے نہ نکلیں۔پاکستان میں لاقانونیت کا راج ہے مسلسل سانحات بڑھ رہے ہیں۔پہلے شریف خاندان نے پنجاب کو اپنی جاگیر بنائے رکھا اور اب عمران خان نے پنجاب کو اپنے ہاتھ کی چھڑی اور جیب کی گھڑی بنا لیا ہے۔آج عملا پنجاب میں کوئی حکمرانی نہیں، بیڈ گورننس کی انتہا ہے۔پہلے سال پنجاب کے وزیر اعلی نے کہا کہ میں لاہور میں شہباز شریف لگ گیا ہوںاور دوسرے سال کہا کہ میرے سر پر خان کا ہاتھ ہے ۔چیف سیکرٹری، آئی جی، سی سی پی او بدل رہے ہیں، انتظامیہ کا سٹریکچر تباہ ہو گیا ہے۔انہوں نے کہا کہ لوگوں نے دیکھا کہ سول ملٹری بیوروکریسی اور اسٹیبلشمنٹ ناکام ہوئی ہے ۔حقیقت میں یہ نظام عمران خان کی شکل میں بدترین شکل اختیار گیا۔ایف اے ٹی ایف کے ذریعے ملک کو غلامی کی طرف دھکیل دیاگیا ہے ۔ملکی معیشت کو آئی ایم ایف کی دہلیز پر ڈھیر کر دیاگیا۔آج ہماری نئی نسل تباہ اور مستقبل تاریک ہے۔پاکستان کا نظام اب انجینئرڈ، اسٹیبلشمنٹ کی ریاستی طاقت سے نہیں چل سکتا۔پاکستان کے عوام کو انصاف چاہئے، حقوق کا تحفظ چاہیے ۔انہوں نے کہاکہ مجرموں کو سر عام پھانسی دینی چاہئے۔پاکستان کے مسائل کا حل اسلام کی حکمرانی ہے۔جماعت اسلامی عوام کو منظم کر کے پاکستان سے ظلم کا خاتمہ کریں گے۔انہوں نے کہا کہ موٹروے پر ظلم کا شکار قوم کی بیٹی کو بتا رہے ہیں کہ وہ تنہا نہیں۔پاکستان کے 22کروڑ عوام آپ کے ساتھ ہیں۔
سیکرٹری جنرل امیر العظیم نے کہا کہ وزیر اعظم صاحب کہتے ہیں کہ نیب نے بڑے بڑے چوروں کو پکڑ لیا ہے مگر عوام پوچھتے ہیں کہ وزیر اعظم صاحب آپ کے ساتھ بیٹھے ہوئے چالیس چوروں میں سے کوئی ایک بھی نہیں پکڑا گیا۔چوروں کا اس وقت سب سے بڑا ٹولہ آپ کے ارد گرد موجود ہے ۔وزیر اعظم نے خود کہا تھا کہ ان کے ارد گرد مافیاز موجود ہے مگر اس مافیا کو جانتے ہوئے بھی وزیر اعظم نے اس سے جان نہیں چھڑائی اور ان مافیاز کو عوام کے جان و مال سے کھیلنے کی کھلی چھوٹ دے رکھی ہے ۔
دھرنے کے شرکاءسے خطاب کرتے ہوئے پنجاب کے امیر جاوید قصوری نے کہا کہ لاہور کے واقعہ نے پنجاب کے وزیر اعلی ٰ اور ان کی پوری ٹیم کی بدانتظامی اور نااہلی کو واضح کردیا ہے ۔وزیر اعلی اگر پنجاب کے عوام کو جان و مال اور عزت کا تحفظ نہیں دے سکتے تو انہیں گھر چلے جانا چاہئے ۔عوام کو اس طرح کے بے بس اور بے حس وزیر اعلیٰ کی ضرورت نہیں۔انہوں نے کہا کہ آج لاہو رکے مال روڈ پر ہزاروں کی تعداد میںلوگ موجود ہیں اگر ہم اپنے کارکنوں کو وزیر اعلی ہاﺅس کے گھیراﺅ کی ہدایت کریں تو کارکن یہاں مستقل ڈیرے ڈال لیں گے مگر ہم حکمرانوں کو سدھرنے کا ایک موقع دینا چاہتے ہیں۔انہوں نے کہا کہ جنسی درندوں کو سرعام پھانسیوں پر لٹکایا جائے تو ان جرائم کا خاتمہ ہوسکتا ہے ۔مگر پیپلز پارٹی ،پی ٹی آئی اور ن لیگ ان مجرموں کو سخت سزائیں دینے کے حق میں نہیں۔انہوں نے کہا کہ آج اپنا جسم اپنی مرضی والا ٹولہ کہیں نظر نہیں آرہا ۔
دھرنے سے خطاب کرتے ہوئے امیر جماعت اسلامی لاہور میاں ذکر اللہ مجاہد نے کہا کہ حکمرانوں کی غیر ت وحمیت کو جگانے کیلئے آج مال روڈ پر ہزاروں زندہ دلان لاہور آئے ہیں اور حکمرانوں سے ملک کی بیٹیوں کی حفاظت کا مطالبہ کرتے ہیں۔انہوں نے کہا کہ ملک بھر میں درندگی کے واقعات بڑھ گئے ہیں لاہور کی گلی محلوں میں وارداتیوں کے ڈیر ے ہیں۔امن و امان کی صورتحال انتہائی مخدوش ہوچکی ہے ۔انہوں نے کہا کہ جرائم میں اضافے کی بڑی وجہ پولیس کو حکمرانوں کے پروٹوکول اور حفاظتی ڈیوٹیوں پر لگانا ہے ۔اگر پولیس کو اپنا کام کرنے دیا جائے اور سیاسی مداخلت ختم ہوجائے تو جرائم کا سدباب ہوسکتا ہے ۔انہوں نے کہا کہ لاہور مسائلستان بن چکا ہے ۔حکمران عوام کا تحفظ کرنے میں بری طرح ناکام ہوگئے ہیں۔

اس خبر پر اپنی رائے کا اظہار کریں

اپنا تبصرہ بھیجیں