اسلام آباد (پاسبان نیوز) وزیر اعظم محمد شہباز شریف سے ایران کے سفیر رضا امیری مقدم نے ملاقات کی ۔وزیر اعظم نے ایران کے صدر ڈاکٹر ابراہیم رئیسی کے دوبارہ انتخاب کے بعد مبارکباد کے پیغام اور ٹیلی فون کال پر ان کا شکریہ ادا کیا۔ وزیراعظم نے اس بات پر زور دیا کہ پاکستان ایران کو بہت اہمیت دیتا ہے اور دونوں ممالک کے درمیان تاریخی اور برادرانہ تعلقات ہیں۔وزیر اعظم نے ایرانی صدر کے ساتھ اپنی یادگار ملاقات کا تذکرہ بھی کیا جب انہوں نے مئی 2023 میں مشترکہ طور پر ایک سرحدی مارکیٹ اور بجلی کی ٹرانسمیشن لائن کا افتتاح کے موقع پر ان سے ملاقات کی تھی جب کہ دونوں رہنماؤں نے 2022 میں سمرقند میں ایس سی او سربراہی اجلاس کے موقع پر بھی ملاقات کی تھی۔
وزیراعظم نے تجارت، توانائی تعاون، سڑک اور ریل رابطے، ثقافتی تبادلے، انسداد دہشت گردی کی کوششوں اور سیکورٹی تعاون کو بڑھانے کے لیے دونوں فریقوں کو مل کر کام کرنے کی ضرورت پر زور دیا۔ وزیراعظم نے جموں و کشمیر کے معاملے پر ایران کی حمایت کو سراہا۔ فلسطین کی صورتحال پر بھی تبادلہ خیال کیا گیا۔ایرانی سفیر نے وزیر اعظم کا ایرانی قیادت کے لئے نیک خواہشات کے اظہار شکریہ ادا کیا دو طرفہ تعلقات کی موجودہ صورتحال پر بات چیت ہوئی۔ ایرانی سفیر نے پاکستان کے ساتھ باہمی دلچسپی کے تمام شعبوں میں اپنے تعلقات کو مزید مضبوط بنانے کی ایران کی خواہش کا بھی اعادہ کیا۔